حنك الكوليرا

wait... مشاهدة
أخر تحديث : الثلاثاء 20 يونيو 2017 - 6:59 صباحًا
حنك الكوليرا

السلام عليكم ..
البوست دا حيزعل مننا ناس كتيريييين وحيتهمونا بالزندقة والجداد الإلكتروني ويمكن الردة كمان .. لكن لا خير فينا إن لم نقلها .. لأننا سودانيين في المقام الأول ويعلم الله اننا نعشق تراب هذا الوطن وبنحب أهلنا و عايزين ليهم كل خير .. و لأننا نصدق العلم .. والعلم فقط بعيدا عن الشائعات والعاب السياسة القذرة وبعييييدا عن أولئك الذين يصطادون في المياة الملوثة .. لو عايز تجينا بي علم علم حباابك ولو بقيت زول بتاع غلاط وركوب راس ساي صدقني حاول أكسب زمنك في حاجة تانية ..
من الأول كدا البوست دا مدعم بي روابط مصادر المعلومات والأرقام للعايز يطلع عليها .. المصادر
١. الموقع الرسمي لمنظمة الصحة العالمية
٢. موقع إي ميديسن المعروووف لإخوانا الاطباء
٣. موسوعة ويكيبيديا الغنية عن التعريف

تعالو نوريكم حقيقة ( وهمة ) مرض الكوليرا وإعلان السودان ( بلدنا نحن – بغض النظر عن الحكومة – ) منطقة موبوؤة ….
وتعالو نتفق برضو إنو الحنك بتاع الكوليرا داجاء متزامن مع رشة المطرة العمت السودان في الأيام الفاتت ومع قرب رفع العقوبات عن السودان وتسليط الضوء على السياحة في السودان وأرض السمر .. وبداية إنفتاحنا على العالم ياااا عالم ..
قبل ما تتعصب وتركب دماغ تعال نوريك القصة بي علم علم ..
مرض الكوليرا بتسببو بكتيريا اسمها ” فايبرو كوليرا ” بتعيش في المياة الملوثة وتنتقل عن طريق افرازات الجهاز الهضمي .. الكوليرا مرض شديد الوبائية يعني مااا بيصيب نفر او اتنين او مية .. بيصيب آلاف مؤلفة ( في أرقام تحت ممكن ترجع ليها ) وبيقتل منهم آلاف مؤالفة في ظرف ٣ ساعات فقط اييييوة .. الفترة الزمنية البتستغرقها الكوليرا علشان تودي الواحد بي هناك فقط ٣ ساعات .. بتتلصق في جدار الأمعاء و بتفرز مادة كيميائية اسمها ( كوليرا توكسين او سم الكوليرا ) يلا دا حرفيا كدا بينشف الجهاز الهضمي تمااااما والمصاب بيعبر خلال ٣ ساعات فقط بدون علاج وخلال ١٠ – ١٤ ساعة بعد العلاج نسبة الوفيات مع العلاج من ١ لي ٣ في المية بدون علاج بتصل الى ٥٠ لي ٦٠ في المية .. قادر تتخيل .. يعني من كل مية نفر بموتو خمسين وحتى البتعالجو منهم بيموت منهم من نفر لي ٣ انفار .. بيموتو ليه ؟؟ لأنو خلال ساعة واااحدة فقط من الإصابة بالمرض ( والإسهال البيشبه موية الرز المميز للكوليرا ) ضغط الدم بيهبط لي مستويات خطييرة لدرجة انك مااا حتلقى وريد تغز فيهو الدرب والمصاب بيستفرغ أي ملح تروية عن طريق الفم ..
طيب حسب منظمة الصحة العالمية علشان نقول الزول دا عندو كوليرا او المنطقة دي فيها كوليرا ” تثبت الإصابة بالكوليرا عندما تستفرد بكتريا الكوليرا من المجموعة المصلية 01 أو 0139 من أي مريض مصاب بالإسهال.”
يعني عزل البكتيريا دي بي الإسم وتكون براااها ما معاها مسبب تاني .. طيب ياااا قوم أليس فيكم رجل رشيد ؟!!حاليا الفحص السريع بتاع النوع دا متوفر في شكل بتاعات كدا زي أجهزة كشف الحمل وال ICT بتاعت الملاريا … في زول واااحد طلع نتيجة فحص واااحدة قال بالجد دي كوليرا وبائية واللا غير وبائية ( الكلام دا لي إخواني وأصدقائي الأطباء والمخبريين ) ..

زي ماقلت ليك في تاريخ وأرقام كدا ممكن توضح ليك يعني شنو لما تقول منطقة موبوءة بالكوليرا في أسفل البوست .. لكن تعال نوريك بيحصل شنو في حال إعلان ” المنطقة الموبوءة ” ( ودا شايفو بقى مطلب جماهيري ) حسب ناس الوبائيات في منظمة الصحة العالمية ..
١. فرض قيود على السفر والاتجار بين شتى مناطق البلد الواحد ؛ والبلدان المجاورة .( يعني منظمات أجنبية ونقاط عبور وتعقيم ونزل لوري المنقة دا نحرقو وبرتكان جبل مرة ما يطلع من جناينو وفشل الموسم و هلاك الحرث والنسل .
٢. إقامة حزام حجر صحي على الحدود يمنع عبور حتى البشر والحيوانات ( تعال هنا البقر دا قاطع بيهو وين ؟؟ خرفان شنو العايز توديها الحج ؟؟ معلششش انت حامل للكوليرا موش حينفع تخش ماسر ( مصر) يا بيه؟؟ ولو سمحتم يا بهاوات عايزين نرش الطيارة بالمبيد علشان الكوليرا .. )
٣. التطبيق الواسع النطاق لعناصر الوقاية الكيميائية، للحد من انتشار الكوليرا، وقد تكون له آثار معاكسة على الانسان والحيوان والتربة ( حيرشو النيل بمواد كيميائية يااا بشر ) .
٤. للبلدان الأخرى الحق في مصادرة أية أغذية غير معالجة قابلة للفساد قادمة من مناطق الحظر ( يعني صور الكركدي والتبلدي الكانت مالية الواتس أب من امريكا والامارات تاتي إلا الكريم ) ..
وتعال نوقعها ليك ..
١. الناس الطيبااانة القلوبها ودعواتها لي أهلنا الطيبين .
٢. ناس الشمارات المتحمسين والرابطين مكنة سبق صحفي وفاة الف نفر في حادث اليم وحريق يلتهم سوق الحمير ..
٣. ناس النسخ واللصق بدون حتى قراية المحتوى
٤. الأطباء الشرفاء الذين يتسابقون لنداء الواجب ..
٥. ناس المعارضة الذي لا هم لهم الا إحراج الحكومة وإثبات فشلها بغض النظر عن نفع المواطن او مراعاة حجم الضرر الواقع عليه ..
بمناداتك بإعلان السودان منطقة موبوءة وترويجك لي حنك الكوليرا دا انت …
١. ضربت الصادرات ( النباتية والحيوانية ) وشوهت صورة منتجاتك اللي العالم كوولو بيحلف بيها
٢. ضربت السياحة جوة وبرا وشوهت صورة البلد .
٣. ضربت جميييع فرص الإستثمارات الجاية من برا في كل المجالات .
٤. صورتك في العالم كووولو انك حامل للمرض . مهما كنت نظييف وظريف في النهاية جايي من السودان .
٥. فرضت الوصاية الدولية على الصحة في البلد ودي بعدين حتدفع فاتورتها انت في شكل ضرائب ( انتو قايلين المنظمات دي بتجي مجانا ) .
بإختصار كدا رجعتنا للمربع الأول أو يمكن قبلو شوية ..

وقع ليك .. طيب الحاصل دا لو ما كوليرا .. الحاصل دا شنو ؟؟؟
ايواااا .. تعالي جاي .. اصلا مصطلح إسهالات مائية دا قاعدين نقولو بالإضافة للكوليرا لي أي التهاب معوي يسبب إسهال مائي حاد (روتا فايروس قارضيا سالمونيلا شيقيللا سمك ولبن نطرة أكل بايت لحم كاشف) والسبب الرئيسي تلوث المياة … وبررررضو بي علم علم وجغرافيا جغرافيا .. النيل دا جايينا من الجنوب للشمال يعني شااايل مالايعله الا الله ( الجثث بشقيها الإنساني والحيواني ) الصرف الصحي وما الى ذلك ..تقووووم اعشاب النيل في الولايات المتاخمة تمسك القصص دي والموية تبقى ملوثة اها والتيار أصلا ضعيف .. يقوووم يجي الخريف ويقووول كدا النيل يفيض و تتحرك موجة المياه الملوثة دي وعااادي اهلنا يشربوها تعمل ليهم نزلات معوية .. للأسف في ناس بتموت ( ومافي مصيبة أكبر من الموت ) لأنو اصلا الاسهال بيسبب الجفاف والجفاف واحد من اكثر مسببات الوفاة عالميا .. ( في إهمال حاصل .. إهمال من الحكومة إهمال وزارة الصحة ، ناس الموية ، إهمال من المواطنين زاااتهم في النظافة الشخصية ونظافة مصادر المياه ) المهم الدراما دي بتحصل كل خريف لو ملاحظ .. بتفوووور كدا وتنطفي
وحكينا القصة دي ليه ..
لأنو في موجة بتاعت مياه ملوثة .. دا كل الحاصل وحتفووور كدا وتنطفي .. لكن لأنو اولاد بومبا بيعرفو يلعبو كويس وصعاليك سياسة وللأسف عندنا ناس بتتكسب بالإصطياد في المياه الملوثة مطلعين حنك الكوليرا دا وبروجو ليهو اسفيريا .. انا شخصيا اتعاملت مع عدد مقدر من الحلات في الخرطوم والولايات ( بعضها عن طريق الهاتف فقط كمان ) ولم تتجاوز اطار العلاج المعروف للإسهالات المائية فقط اعادة تروية المصاب ( فراشة جلكوز رنقر لاكتيت درب فلاجيل كباية قهوة تقييلة ثلاثة ظروف ملح تروية لي تاني يوم والمصاب ببقى كوييييس ويرجع عاادي يكتب ( اعلنو السودان منطقة موبوءة بالكوليرا ) والبخليني متأكد من كلامي دا .. في كل منزل بيكون في مصاب واااحد او اثنين على الاكثر ومعاهو سبعطاشر مرافق .. لو الموضوع كان كوليرا بالجد والله البيت ما يفضل فيهو نفاخ النار والجيران برضو .. وجيران جيرانهم كمان ..

معليييش شغلتها ليكم لكن والله الموضوع ماكل معاي جمبة عديييل لأنو في ناس متعلميين و عارفيين وساكتييين
المشكلة المصاب زاااتو لما تقول ليهو عند كوليرا احتمال ينشف من الخوف قبل الاسهال ..
هذا ما فتح الله به علينا ” وإن اردت إلا الإصلاح ما استطعت ” .
البوست دا ليك انت بس لأنو انت تستاهل تفهم الحاصل .. أما ناس الغلاط والجعجة في الفاضي والمليان فلا بوست لهم ومااا تنشرو ولاتشاركو معاهم زاتو ..
#د.غبشاوي June 18
تاريخ :-
في عام 1820 في الهند ماتو 10،000 فرد من القوات البريطانية وعدد لا يحصى من الهنود خلال هذا الوباء.[24]

1851-1829 – وباء الكوليرا الثاني الذي وصل إلى روسيا (انظر أعمال شغب الكوليرا)، المجر (حوالي 100،000 حالة وفاة) ألمانيا في عام 1831، لندن (أكثر من 55،000 شخصا لقوا حتفهم في المملكة المتحدة) [26]،

وهاك دي قرييبة وجمممبنا … أغسطس 2008 – أبريل 2009: في تفشي وباء الكوليرا في زيمبابوي ، والذي لا يزال مستمرا، قدر عدد المصابين بالكوليرا أكثر من 96591 شخص، وبحلول 16 نيسان/إبريل 2009 تم الإبلاغ عن 4201 حالة وفاة.[54] ووفقا لمنظمة الصحة العالمية،
قادر تقراء وتتخيل الأرقام دي ؟؟ دا بقى إسمو وباء ..

مراجع :-
http://www.who.int/topics/cholera/control/ar/index7.html

https://ar.m.wikipedia.org/wiki/كوليرا#cite_note-Sherris-1

http://www.medscape.com/viewarticle/880267

#انت سوداني أنت واااعي .
#انااصدق العلم .
#جدادالكتروني .
#مناضلواالكيبورد

نرجو من الاخوة المتابعين مشاركة التقرير ليصل الكل
#رشاش

رابط مختصر

أضـف تـعـلـيق 0 تـعـلـيـقـات

يجب عليك تسجيل الدخول لترك التعليق.